साडेसातीचा प्रभाव कमी होईल, शनिही त्रास देणार नाही; हनुमंतांची उपासना ठरेल वरदान

ज्योतिषशास्त्रानुसार, जेव्हा शनिदेवाची साडेसाती किंवा ढिय्या सुरू असतो, तेव्हा व्यक्तीला शारीरिक, मानसिक आणि आर्थिक संघर्षाला सामोरे जावे लागते. सध्याच्या काळात मेष, कुंभ आणि मीन या राशींवर साडेसातीचा प्रभाव आहे. अशा वेळी पवनपुत्र हनुमानाची उपासना करणे हे शनिपीडेपासून मुक्ती मिळवण्यासाठी एक प्रभावी 'कवच' मानले जाते.

हनुमान आणि शनिदेव: पौराणिक संबंध

रामायण काळातील एका कथेनुसार, हनुमंतांनी शनिदेवाला रावणाच्या तावडीतून मुक्त केले होते. तेव्हा प्रसन्न होऊन शनिदेवांनी वचन दिले होते की, जो कोणी हनुमंताची मनोभावे भक्ती करेल, त्याला मी कधीही त्रास देणार नाही. तसेच, शनिदेव हे महादेवांना आपले गुरु मानतात आणि हनुमान हे महादेवांचेच अकरावे 'रुद्र अवतार' आहेत. म्हणूनच हनुमान उपासनेमुळे शनिदेव शांत होतात, अशी मान्यता आहे.

साडेसातीचा प्रभाव कमी करण्यासाठी प्रभावी उपाय

ज्या राशींवर शनिची वक्रदृष्टी आहे, त्यांनी नियमितपणे खालील कृती केल्यास पुण्यफळ प्राप्त होते:

१. स्तोत्र पठण: दररोज किंवा किमान दर शनिवारी समर्थ रामदास स्वामी रचित 'मारुतीस्तोत्र', 'हनुमान चालीसा', 'बजरंग बाण' किंवा 'सुंदरकांड' याचे वाचन करावे. हनुमंताच्या पराक्रमाचे गुणवर्णन केल्याने घरातील नकारात्मकता दूर होते.

२. शनिवारी मारुतीचे दर्शन: शनिवारी हनुमान मंदिरात जाऊन दर्शन घ्यावे. हनुमंताला आवडणाऱ्या गोष्टी अर्पण कराव्या.

३. मंत्र जप: हनुमंताच्या नामस्मरणासोबतच शनिच्या मंत्रांचा यथाशक्ती जप करावा.

मूलमंत्र: ॥ ॐ शं शनैश्चराय नमः ॥

बीज मंत्र: ॥ ॐ प्रां प्रीं प्रौं सः शनैश्चराय नमः ॥

स्तोत्र मंत्र: नीलांजनसमाभासं रविपुत्रं यमाग्रजम्‌। छायामार्तण्ड सम्भूतं तं नमामि शनैश्चरम्‌॥

४. महादेवांची उपासना: शनिदेव हे शिवभक्त असल्याने, साडेसातीच्या काळात 'ॐ नमः शिवाय' या मंत्राचा जप करणे किंवा शिवपिंडीवर अभिषेक करणे अत्यंत शुभ मानले जाते.

शनिवारी करायच्या धार्मिक कृती:

पिंपळ पूजन: शनिवारी पिंपळाच्या झाडाला दूध आणि पाणी मिश्रित अर्घ्य अर्पण करावे. झाडाखाली तिळाच्या तेलाचा दिवा लावल्याने शनिचा प्रतिकूल प्रभाव कमी होतो.

दानधर्म: शनिदेव हे कर्माचे न्यायाधीश आहेत. त्यामुळे गरिबांना काळे तीळ, तेल, काळे कापड किंवा अन्नाचे दान केल्यास शनिची कृपा लाभते.

रत्न परिधान: तज्ज्ञांच्या सल्ल्यानुसार आणि कुंडलीतील ग्रहांची स्थिती पाहूनच 'नीलम' सारखे रत्न शास्त्रोक्त पद्धतीने धारण करावे.

शनि धाम यात्रा: ज्यांना महादशेचा तीव्र त्रास आहे, त्यांनी शनिच्या तीर्थक्षेत्रांची (उदा. शनि शिंगणापूर) यात्रा करणे लाभदायक मानले जाते. टीप: सदर माहिती सामान्य धार्मिक आणि ज्योतिषीय मान्यतांवर आधारित आहे. अधिक सखोल मार्गदर्शनासाठी आजच आमच्या अनुभवी ज्योतिषांचा सल्ला घ्या. https://www.lokmatbhakti.com/ या वेबसाईटला नक्की भेट द्या.